all-täglechs

IMG_2472-2

Das Bild chönnt irgendwo im Wältall gmacht worde si, dert irgendwo dürnes Fenschter vore Ruumstation, wo es Gitter vor dran isch. Und gäge alli gültige Natur- und Allgsetz wachst dert uss im All äs Blüemli, eis, wo Interesse ade Mönsche hingerem Fenschter bekundet. Ir Realität aber gseht meh uf dem Bild aber äs Blüemli, wo im Schacht vom Stadtbach wachst, unger ir Bärner Altstadt. Und das wome schwach gseht funkle im Hintergrund, das si keni Stärne, sondern das isch das Wasser, wo dert d‘ Stadt dürabfliesst und e churzi Begegnig mit Sunnestrahle het. Und äs gubti vilech Lüt wo  dere sunnesuechende Pflanze gar nid Blüemli sondern Gjät würde säge, und vilech gits die gelbi Pflanze gar nüm lang dert, wüu se irgend e Gärtnerin oder e Gärtner entfernt, wüu dert unge nüt setigs häreghört, aber das isch alls gliich. I bi churz usem Alltagstrott gworfe worde wäg dem Fund, und mini Gedanke si fürne churze Moment abdriftet, ids Wältall. So öpis, das isch mängisch ganz schön.

Tour de Suisse

Tour de Suisse

Ghört: „Dr Tschugger het gseit, aus Fuesgänger chömemer überau düre“.

À propos Polizei: Was ds Amerika dr Donut isch, isch ir Schwiz d Glace, ömu hüt. Fasch jede vode Polizischte, u vo dene hets hüt viu gha, steit oder louft mit sore Glace dasume, wo gratis verteilt worde isch (ads ganze Volk nid nume ad Polizischte. Aber bide Uniformierte fauts haut bsungers uf).